ភ្នំពេញ៖ រដ្ឋសភាកម្ពុជានឹងបើកកិច្ចប្រជុំនៅថ្ងៃទី១ ខែមីនា ឆ្នាំ២០២៤ ខាងមុខដើម្បីបោះឆ្នោតជ្រើសតាំងសមាជិក ២រូបធ្វើជាសមាជិកព្រឹទ្ធសភា។ ការសម្រេចនេះគឺបន្ទាប់ពីគណៈកម្មាធិការអចិន្ត្រៃយ៍សភាបានបើកកិច្ចប្រជុំមួយនៅព្រឹកថ្ងៃព្រហស្បតិ៍ ទី១៥ ខែកុម្ភៈ ឆ្នាំ២០២៤នេះ។
អគ្គលេខាធិការរដ្ឋសភាលោក ឡេង ប៉េងឡុង បានថ្លែងប្រាប់អ្នកសារពត៌មានថាមានសមាជិកសភា ៥រូបដែលត្រូវបានអគ្គលេខាធិការដ្ឋានជ្រើសរើសដាក់ជូនទៅសភាដើម្បីបោះឆ្នោតរួមមានលោក សុខ ឥសាន លោក ហេង ហាលីម លោក សារ៉ុន រិទ្ធា លោក អៀ ឃីម៉េង លោក ឌី ទេពកោសល្យ។
ព្រឹទ្ធសភាគឺជាអង្គការដែលមានអំណាចនីតិប្បញ្ញត្តិ ហើយបំពេញភារកិច្ចរបស់ខ្លួនដូចបានកំណត់ក្នុងរដ្ឋធម្មនុញ្ញ និងច្បាប់ជាធរមាន។
យោងតាមមាត្រា១០០ថ្មី នៃរដ្ឋធម្មនុញ្ញកម្ពុជាចែងថា ព្រឹទ្ធសភាមានសមាជិកចំនួន ២រូប ត្រូវបានចាត់តាំងដោយព្រះមហាក្សត្រ ២រូបទៀតត្រូវបានរដ្ឋសភាជ្រើសតាំងតាមមតិភាគច្រើនដោយរបៀប រីឯសមាជិកព្រឹទ្ធសភាឯទៀត ត្រូវបានជ្រើសតាំងដោយការបោះឆ្នោតអសកល។
គួរឱ្យដឹងដែរថាការបោះឆ្នោតជ្រើសតាំងសមាជិកព្រឹទ្ធសភានឹងប្រព្រឹត្តិទៅនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខ៕
